Byderhand Rusplekstories is 'n interaktiewe leeservaring vir ieder en elk. Lees kortverhale en kinderstories in Potchefstroom, oor Potchefstroom, deur skrywers van Potchefstroom.
De Jonge Akker, Studentesentrum, Potchefstroomkampus, NWU.
“As jy ‘n dorp regtig wil leer ken, moet jy nie in sy kerke sit of uithang in sy kroeë nie. Jy moenie na die damestee of die uitvoerings by die teater gaan nie. Jy moenie sy studente leer ken nie, want hulle is in elk geval almal dieselfde en daar is niks om te leer nie. As jy ‘n dorp wil ken, moet jy miskien na sy bome kyk. Die eikelaan. Miskien moet jy na die Mooirivier loop en gaan sien wie stap daar teen skemer met hul honde. Maar die heel beste manier om ‘n plek te leer ken, is eintlik deur jou deel te maak van sy waansinniges.” (Marlize Hobbs, As sy weer kom)
Byderhand Rusplekstories is aangebied by Clover Aardklop Nasionale Kunstefees 2015 (6 tot 10 Oktober 2015). Besoekers aan die kunstefees kon die kortverhale en kinderstories by die Boeke-Oase, Gebou B2, NWU, Hoffmanstraat, Potchefstroom lees. Sedert Augustus 2016 kan die Rusplekstories gelees word in De Jonge Akker op die NWU-Potchefstroomkampus.
Lees kortverhale en kinderstories deur skrywers en kunstenaars soos Harry Kalmer, Sophia Kapp, Helene de Kock, Roela Hattingh, Nelia Engelbrecht, Frederick J. Botha, Leon de Villiers, Flip Hattingh, Zinelda McDonald en Deon Meiring. Alle verhale speel in Potchefstroom af.
De Jonge Akker is 'n koffiewinkel in die studentesentrum op die kampus van die Noordwes-Universiteit, Potchefstroom. Hier kan jy die beste koffie op die NWU Potchefstroom kampus drink. Met 'n akademiese gevoel, waar studente, dosente en ouers lekker kan sit en kuier. Tye 07:00 - 20:00.
Toestemming: Byderhand is 'n kreatiewe en navorsingsprojek oor plekspesifieke digitale literatuur. Wanneer jy deelneem aan die projek verleen jy toestemming dat die data vir navorsingsdoeleindes gebruik kan word. Jou deelname aan en terugvoering oor die projek is waardevol.
Duane Aslett is tans ʼn senior lektor in regte aan die Program vir Forensiese Rekeningkunde, Noordwes-Universiteit (Potchefstroomkampus), waar hy ook die huisvader van Veritas Manskoshuis is. Hy was voorheen ʼn bestuurder aan Pricewaterhouse Coopers Ing. se forensiese afdeling en senior aanklaer aan die Nasionale Vervolgingsgesag van Suid-Afrika. Gedurende 2013 het hy twee kortverhale (Die Stropers en Die Biegblad) in Huisgenoot gepubliseer en sy debuutroman, Skoppensboer, is in Augustus 2014 onder NB Uitgewers se Queillerie druknaam uitgegee. Duane lees tans vir sy doktorale proefskrif getiteld Combating Organised Crime in South Africa.
Frederick J. Botha is in 1988 gebore. In 2009 ontvang hy die graad BA Geesteswetenskappe aan die NWU-Potchefstroomkampus en in 2010 sy honneursgraad in Afrikaans (cum laude) aan die Universiteit van Johannesburg. Aan dieselfde universiteit behaal hy in 2013 sy meestersgraad in Afrikaans (cum laude). Hy is tans besig met sy doktorsgraad in Afrikaanse letterkunde aan die NWU-Potchefstroomkampus. In 2013 word twee van sy kortverhale opgeneem in Nuwe Stories 2. Drie van sy kortverhale verskyn in 2014 in Nuwe Stories 3 en hy word aangewys as die wenner van Human & Rousseau se Nuwe Stories 3-wedstryd. Hy woon in Johannesburg waar hy Afrikaanse letterkunde aan die Universiteit van Johannesburg doseer. Hy werk tans aan sy debuutkortverhaalbundel.
Helene de Kock het haar MA (2008) en PhD (2014) in Afrikaans en Nederlands (Skryfkuns) aan die NWU verwerf. Helene en haar man, dr. Jos de Kock, woon in Midstream naby Pretoria. Sy het ook 13 jaar in Potchefstroom gewoon en sterk vriendskapsbande daar gesmee. Helene het meer as veertig boeke in verskillende genres geskryf. Haar jongste publikasies is ‘n historiese roman, Debora en seuns (2015), uitgegee deur Human & Rousseau asook ‘n wetenskaplike artikel in Literator met die titel Die skep van werklikheidsbeeld in ‘n roman (2015).
Hans du Plessis was tussen 1981 en 2011 aan die Potchefstroomkampus van die NWU verbonde, eers as professor in Afrikaanse taalkunde en sedert 1990 as direkteur van die ATKV-skryfskool van die NWU. Sedert 2012 is hy navorsingsgenoot in die Navorsingseenheid vir Taal- en Letterkunde, Skool vir Tale. Hy het reeds ses digbundels en nege romans gepubliseer. Heelparty van die romans speel in Potchefstroom en omgewing af. Jongste publikasie: Inboekeling, 2014, historiese roman, Tafelberg-uitgewers.
Franci Greyling is professor in Skryfkuns aan die Noordwes-Universiteit, Potchefstroomkampus. As kind het die gesin vir ʼn paar maande in Potchefstroom gewoon en sy het haar skoolloopbaan by laerskool Mooirivier begin; later het sy as student aan die PU vir CHO in Kasteelkoshuis gewoon; sedert 2002 is sy ʼn permanente inwoner van Potchefstroom. Haar eie kreatiewe publikasies sluit in kinder- en jeugboeke, kortverhale, verse, kunstenaarsboeke, ʼn radiodrama en die webtuiste, Storiewerf. Haar jongste werk is ʼn kunstenaarsboek, Mooirivier: weerspieëling en weerklank.
Anneretha Grobler is gebore en getoë in Pretoria. Sy matrikuleer in 1998 aan die Afrikaanse Hoër Meisieskool Pretoria, waarna sy haar studies in Kommunikasiekunde aan die Noordwes-Universiteit (Potchefstroom) begin. As deel van die organisasie Karos & Kambro, raak sy in dié tyd betrokke by gemeenskapsontwikkeling in Promosa buite Potchefstroom. Tydens haar voor- en nagraadse studies is sy ook werksaam as assistent by die ATKV Skryfskool en Vakgroep Skryfkuns, waar haar passie vir gemeenskapseie skryfkuns neerslag vind in verskeie gemeenskapsprojekte. As uitvloeisel van haar PhD-studies, publiseer Anneretha in 2013 die artikel "Multidissiplinêre vennootskappe in gemeenskapseie woordkunsprojekte: 'n gevallestudie" in Literator.
Ek is ’n dosent by die Universiteit van Johannesburg in die Departement van Strategiese Kommunikasie, ’n vryskut kopieskrywer en bied ook kreatiwiteits- en skrywerswerkswinkels aan by maatskappye veral in die kommunikasiebedryf of op enige plek waar mense my vra. Potchefstroom is veral die plek waar ek begin dink het. Dis hier waar my vrae plek gemaak het vir onaanvaarbare antwoorde. Oomblikke wat soos foto’s opduik: piekniek en grootdoop in die Mooirivier; kerkkruipery; ja-stemme, massavergaderings, maaskaaskoekies van Turkstra; Thalia; kaalvoetloop oor die kampus; toweragtige verbintenis met taal en tydgenote. Kamee is ‘n bundel kortverhale uitgegee deur Human & Rousseau in April 2015.
Gebore en grootgeword op 'n plaas in die Vryburg omgewing, naby die ou Bophuthatswana. Was in Laerskool Louwna met net 50 leerlinge en later Hoërskool Vryburg. Maatskaplike werk by RAU geswot. 15 jaar in praktyk as maatskaplike werker gewerk. Afgelope twee jaar die koordineerder van maatskaplike werk praktykopleiding by Unisa. Marlize was ses jaar lank 'n maatskaplike werker in Potchefstroom waar sy Potch Multisorg se Psigiatriese afdeling intiem leer ken het ... en daardeur natuurlik die mense van die dorp. Sy is die skrywer van Flarde (wenner van UJ prys vir debuut; Eugene Maraisprys en Jan Rabie / Rapportprys (2005) en Score my ‘n Gwai (benoem vir Kyknet Filmprys (2013), en verskeie kortverhale.
Gerrit Jordaan is ’n konsert-orrelis en komponis wat sedert 2004 in Potchefstroom woon. As postdoktorale-genoot was hy tot einde verlede jaar betrokke by die Skool vir Musiek (NWU) en is tans vryskut musikant. Hy is besig met die skryf van ’n derde kleuteroperette met ’n musiek-didaktiese tema (Giliegap gil ‘n G en Kirts is vorige operettes). Gerrit het artikels, CD’s en musiekbundels gepubliseer oor Suid-Afrikaanse kerk- en konsertmusiek (o.a. Het Orgel, Tydskrif vir Geestewetenskappe, Muziki, Musikus, Talking Drum, SAKOV Fees- en Erediensmusiekbundels, VONKK webblad, YouTube). Hy is genooi om later vanjaar orreluitvoerings van veral Suid-Afrikaanse orrelmusiek in Switserland, Nederland en Hongarye te gee.
Harry Kalmer is die skrywer van 23 toneelstukke en nege boeke prosa. Tussen 1999 en 2012 is 13 van sy toneelstukke by Aardklop gesien. Hy was die eerste wenner van die Ashanti Gold Aardklop prys. Sy roman, ‘n 1000 stories oor Johannesburg (2014), was reeds op die kortlys vir vier Afrikaanse literêre pryse. Sy drama The Bram Fischer Waltz (2013) met die Standard Bank Silver Ovation Award en die Adeaide Tambo toekenning vir menseregte in die kunste bekroon.
Sophia Kapp het 'n aantal jaar in Potchefstroom gewerk, eers as dosent in taalkunde aan die destydse PU vir CHO en later as dosent in vertaalkunde aan die NWU. Sy is tans senior taaladviseur vir die Virtuele Instituut vir Afrikaans en woon in Pretoria. Sy het tot dusver agt liefdesromans gepubliseer (Driehoek het in 2013 verskyn).
Ek bly al vir meer as sewe jaar in Potch waar ek ook my BA en BA Honneursgrade cum laude ontvang het. Ek is tans besig met my MA-verhandeling wat handel oor trauma binne die oeuvre van Marita van der Vyver. Ek is seker almal wat al so lank in Potch bly sal weet watter bekoring die dorp inhou.
Susan Lombaard is uitvoerende hoof van Maroela Media, ʼn gratis Afrikaanse nuus- en inligtingswebwerf. Voordat sy in 2011 by Maroela Media betrokke geraak het, was sy redakteur van onder meer die Taalgenoot. Sy het van 1996 tot 1999 Bedryfskommunikasie aan die voormalige PU vir CHO studeer, waar sy ʼn inwoner van Wanda Dameskoshuis was. Susan het in 1999 haar honneurs (cum laude) in Joernalistiek en Skryfkuns voltooi.
Didi Potgieter woon haar lewe nog in Potchefstroom en haar wortels loop so diep soos die akker- en wilgebome van die mooi plek. Sy is tans besig met haar Meestersgraad aan die NWU en skryf romanses as daar tyd tussen werk, swot en ma-wees is. Haar jongste Romanza is Liefde vir 'n vuurvreter!
Ek is in Potchefstroom gebore, matrikuleer in 2009 aan Promosa Sekondêre Skool en studeer daarna vir vyf jaar aan die Noordwes-Universiteit. In 2010 verwerf ek my BA-graad in Tale en Literatuurstudies. Naas Afrikaans en Setswana, was Skryfkuns een van my kernmodules. Ek het vir drie jaar die voorreg gehad om klas te kry by Proff. Franci Greyling, Hans du Plessis en Bernard Odendaal en het ook as Skryfkunsassistent diens gedoen. In 2012 verwerf ek ’n Nagraadse Sertifikaat in Onderwys en in 2014 B.Ed Honneurs in Onderwysbestuur, -regte en -stelsels. Ek werk tans voltyds as Afrikaanse onderwyseres by Promosa Sekondêre Skool.
Elma de Kock is ‘n taalpraktisyn en tolk. Sy het ‘n MA in Afrikaans en Nederlands verwerf in kreatiewe skryfwerk waar sy ‘n poëtiese verwerking van die klassieke teks van “Pieter en die Wolf” gedoen het. Sy is getroud en het drie dogters. Sy woon reeds 13 jaar in Potchefstroom op die Bult en het twee grade aan die destydse PU vir CHO verwerf en twee grade aan die NWU (Potchefstroomkampus). Sy is betrokke by aksies in Potchefstroom deur skole en die kerk.
Skrywer van Die Guite trek: Gebore en grootgeword in Pretoria. ‘n Paar jaar skoolgehou voordat hy voltyds begin skryf en kuns maak het. Die meeste van sy skryfwerk (kinder en jeugboeke soos onder andere Erik en die kiddodinges, Droomoogdiepgrawer en Maroelaboomstories), het dan ook in en om Potchefstroom gebeur waar hy tussen 1997 en 2009 gewoon het. Sy laaste gepubliseerde werk was in 2009. Dit was Shorn, vertaling van sy jeugboek Toko. Leon woon tans op `n plaas in die Bethlehemdistrik waar hy steeds skryf en ander kunsvorme bedryf. Leon het steeds `n naweekplasie in die Vredefortkoepel digby Potch. Leon se jeugboek Die pro, is in 2015 verfilm en vertoon sedert 19 September 2015 op die silwerdoek.
Illustreerder van Die Guite trek: Fanie is gebore in 1988 in Newcastle. Hy het skoolgegaan by Hoërskool Gerrit Maritz in Pretoria. Fanie werk tans by `n maatskappy wat industriële skale vervaardig. Hy het Potchefstroom al verskeie kere besoek in verband met sy werk. Die tekeninge vir die Guite, was Fanie se eerste ondervinding in die illustrasies van kinderstories. Hy het dit baie guitig gevind.
In die dae wat my ateljee leeg staan gee ek klas in Multimedia en verwante dinge, in die dae wat my atlejee nie leegstaan nie maak ek goed wat soms beskrywe kan word as kuns, en soms doen ek illustrasies en soms doen ek 'n boek - meesal 'kunsboeke'
m.a.w. dit word nie in massas gekopieer nie, maar ek is darem ook 'n kinnerboek sterk, gepubliseer somewhere in hierdie millenium (ek vergeet die jaar).
in my vroegste lewe had ek op potch geswot, maar destyds het ons nog met ossewaens gery en 'microfish' in die biblioteek gehad.
Ek lewe by die leuse: you can be young but once but you can be childish forever.
Deon Meiring is 'n musikant en liedjieskrywer. Hy is oorspronklik van Humansdorp in die Oos Kaap en bly tans in Pretoria. Hy het van 2008 tot 2010 BA Kommunikasiekunde studeer aan die NWU se Potchefstroomkampus met Skryfkuns as hoofvak. Deon is liedjieskrywer, sanger en kitaarspeler in die groepe Glaskas en Dans Dans Lisa en het in September 2014 sy solo debuut gemaak met sy kortspeler "Die Slaapkamersessies".
Zinelda McDonald is 'n kinderboekillustreerder en ontwerper. Sy is oorspronklik van Jeffreysbaai en bly tans in Pretoria. Sy het van 2006 tot 2009 Grafiese Ontwerp studeer aan die NWU se Potchefstroomkampus waar sy haar liefde vir kinderboekillustrasie ontdek het. Sy het al talle boeke geïllustreer en voorblaaie ontwerp waarvan haar nuutste publikasies Die Coolste Ouma op Aarde deur Marita van der Vyver en Op die punt van my tong deur Jaco Jacobs is.
Dedré is op Dundee in Kwa-Zulu-Natal gebore en het daar grootgeword. Sy woon tans in Potchefstroom en doseer Onderwyskuns by die Fakulteit Opvoedingswetenskappe. Sy het vyf jaar in Potchefstroom gestudeer en was in Heide-dameskoshuis. Na ‘n draai in die Vaaldriehoek is saam met haar gesin terug Potch. Sy woon en werk al die afgelope 13 jaar hier. Die akkerbome in Potchefstroom herinner haar aan die genade van seisoene en die mooi van die lewe. Buiten vir die publikasie van gedigte in enkele bundels, doen sy ook illustrasies vir tydskrifte en kinderboeke.
Ek is in Klerksdorp gebore en getoë en het kommunikasiekunde aan die voormalige Potchefstroomse Universiteit vir Christelike Hoër Onderwys studeer. Ek werk die afgelope tien jaar as korporatiewe skrywer by die Noordwes-Universiteit en woon in Potchefstroom. My jongste boek is ‘n tienerverhaal, Die vierletterwoord, wat in 2013 by Tafelberg verskyn het.
Ek is 'n aspirantskrywer en -dosent. Ek hou daarvan om met mense te werk, met taal te werk en myself doenig te hou met navorsing. Dit is vir my lekker om kreatiewe projekte aan te pak en ek geniet dit ook baie om te organiseer. Ek is 'n derdejaar BA Taal- en Literatuurstudie student aan die Noordwes-Universiteit. Ek studeer hier vanaf 2013 en geniet die omgewing - amper dorp, amper stad.
Mione du Toit (1937-2015) was ‘n doyenne van restourasie in Potchefstroom. As kurator van die Potchefstroom museum van 1975-1985 het sy aan die hoof gestaan van restourasie van drie huismuseums in die stad waaronder die Totiushuis. Sy was ook die samesteller van verskeie publikasies. Sy was getroud met Dirk du Toit, ‘n kleinkind van Totius, die Afrikaanse digter, Bybelvertaler en rektor van die Teologiese Skool. Mione was ‘n nooi Smith en het sedert haar standerd 6 jaar in Potchefstroom gewoon. Sy en haar gesin het vir etlike dekades in Meulstraat langs die Mooirivier gewoon.
Jenna-Leigh Schoeman is ‘n Graad 12-leerder aan Hoërskool Promosa.
Martie Swanepoel is 'n bekroonde joernalis en dosent. Sy het in haar loopbaan van 33 jaar onder meer vir publikasies soos Beeld, Sarie en Rooi Rose geskryf. Sy doseer Engels aan die Midrand Graduate Intitute in Potchefstroom. Sy het vanjaar die silwer toekenning in RSG en Sanlam se dramakompetisie gewen vir haar drama Sonate.
An-Mari Fouché is in 1995 in Potchefstroom gebore en het grootgeword op ʼn plaas naby Lichtenburg. Sy in 2015 haar BA Taal- en Literatuurstudie graad by die NWU-Puk begin. Sy is tans ʼn derdejaar, met Skryfkuns as hoofvak en beplan om ook haar Honneursgraad in hierdie vak te voltooi. Sy bly al vanaf 2015 in Potchefstroom.